SciTechDaily порталы маалымдагандай, Ливерпульдөгү Жон Мурс университетинин окумуштуулары күнүмдүк суу ичүү нормасын аткарбаган адамдардын организминде стресстин негизги гормону болгон кортизол көбүрөөк бөлүнөрүн аныкташкан. Бул жүрөк ооруларынын, диабеттин жана депрессиянын коркунучун жогорулатат, жазат InoZpress.
Journal of Applied Physiology илимий журналына жарыяланган изилдөөнүн жыйынтыгында, күнүнө 1,5 литрден аз суюктук ичкен адамдар стресстик кырдаалда кортизол гормонун 50% көп бөлүп чыгарганы аныкталган. Ал эми суу ичүү нормасын сактаган адамдарда мындай реакция байкалган эмес. Ушул аркылуу изилдөөчүлөр суу жетишсиздиги организмдеги стресске болгон жоопту күчөтөрүн жана узак мөөнөттүү ден соолукка терс таасир тийгизерин белгилешет.
Изилдөө кандай жүргүзүлдү
Изилдөөгө катышкан жаш жана ден соолугу чың адамдар күнүмдүк суюктук ичүү көлөмүнө жараша эки топко бөлүнгөн: «аз ичкендер» жана «нормада ичкендер». Бир жума бою алар кадимкидей ичүү режимин улантышып, кан жана заара анализдери аркылуу алардын гидратация деңгээли текшерилген.
Андан кийин алар стресстик абалды симуляциялаган атайын тесттен өтүшкөн. Эки топ тең бирдей деңгээлде тынчсызданган, бирок «аз ичкендерде» кортизол деңгээли кыйла жогорулаган. Мындан тышкары, аларда зааранын түсү карарып, курамы концентраланып кеткен, бул суусуздануунун негизги белгилери катары бааланат.
Эмне үчүн суусуздануу кооптуу
Организмдеги суунун деңгээлине жооп берген вазопрессин гормону суусузданган учурда активдешет. Бул гормон бөйрөккө таасир этип, суюктукту кармап калууга жардам берет, бирок ошол эле маалда мээнин стресс реакциясына жооптуу болгон гипоталамус бөлүгүнө да таасир этет.
Мунун натыйжасында кортизолдун бөлүнүп чыгышы күчөйт. Вазопрессиндин узак убакытка бөлүнүшү бөйрөктүн ишине кошумча күч келтирип, организмдеги гормоналдык тең салмактуулукка залакасын тийгизиши мүмкүн. Бул болсо ар кандай өнөкөт оорулардын өнүгүшүнө алып келиши мүмкүн.
Ден соолукту сактоонун жолдору
Окумуштуулар изилдөөнүн натыйжалары күнүмдүк суу ичүү боюнча эл аралык нормаларды тастыктап жатканын айтышат: аялдар үчүн — 2 литр, эркектер үчүн — 2,5 литр.
Гидратация деңгээлин аныктоонун жөнөкөй жолу — зааранын түсүн көзөмөлдөө. Ачык сары түс нормалдуу абалды көрсөтөт. Эгерде күнүңүз стресс менен коштолуп, маанилүү сүйлөө же иш чара күтүлүп жатса, суу бөтөлкө дайыма колуңузда болушу керек. Бул организмге стрессти жеңил кабыл алууга жардам берет.
Биз буга чейин жазганыбызды эскертебиз, омүрдүн узактыгынын өсүшү чегине жетти.