Кыргыз Республикасынын Тышкы иштер министрлигинин маалыматына караганда, учурда Орусиянын аймагында «Яндекс» компаниясынын сервистери аркылуу 44 миңден ашуун кыргыз жараны жумушта. Бул маалыматтар Москва шаарында өткөн расмий жолугушуудан кийин ачыкка чыкты. ТИМдин орун басары Алмаз Имангазиев «Яндекс» жана «ВиЭф Сервисес» компанияларынын өкүлдөрү менен жолугуп, жарандарыбыздын укуктук абалын жана кызмат көрсөтүүдөгү маселелерди талкуулады.
Бул тууралуу «InoZpress» шилтеме берүү менен билдирди 24.kg
Сүйлөшүүлөрдүн жүрүшүндө Кыргызстандык жарандардын такси кызматтарында эмгектенүү учурунда кездешкен көйгөйлөрү, алар үчүн коопсуз жана мыйзамдуу шарттарды түзүү мүмкүнчүлүктөрү каралды. Ошондой эле келечектеги кызматташуу, өз ара аракеттенүүнү өркүндөтүү маселелери күн тартибине коюлду.
«ВиЭф Сервисес» компаниясы менен жүргүзүлүп жаткан пилоттук долбоор консулдук кызматтарды жаңы деңгээлге чыгаруусу мүмкүн. Бул кызматтар Москва, Самара, Краснодар жана Калининград шаарларындагы атайын сервистик борборлордо көрсөтүлө баштады. Максат — жарандарды элчиликке же консулдук мекемелерге барбай эле документтерди тапшыруу мүмкүнчүлүгү менен камсыздоо.
Жолугушуунун соңунда тараптар маалыматтык түшүндүрүү иштерин күчөтүү боюнча макулдашты. Кыргыз жарандары документтерин сервистик борборлордо алдын ала жазылуу аркылуу же түздөн-түз барып тапшыра алышат. Бул ыкма көп убакытты үнөмдөп, консулдук кызматтарды жеткиликтүүрөөк кылууга шарт түзөт.
Биз буга чейин жазганыбызды эскертебиз, Кыргызстанда ӨКМ үчүн өрттү эсепке алуу жана талдоо системасы иштелип чыгат.