OpenAI компаниясы АКШда ChatGPTде жарнаманы тестирлей баштады, жарнамалар акысыз тарифти жана жаңы Go планын колдонгон айрым колдонуучуларга көрсөтүлөт. Бул тууралуу OpenAI маалымдады, жазат InoZpress.
Бул эксперимент ChatGPT 2022-жылы ишке киргизилгенден бери биринчи жолу өткөрүлүүдө. Жарнамалар демөөрчүлүк катары белгиленет жана компаниянын айтымында, чат-боттун жоопторунун мазмунуна таасир этпейт.
Жарнаманы кимдер көрөт жана Go планы канча турат
Тестирлөө АКШдагы авторизацияланган колдонуучулардын арасында жүргүзүлүүдө:
- акысыз тарифте;
- жаңы Go планында.
Go жазылуусу январь айынын ортосунда пайда болду жана айына 8 доллар турат, бул болжол менен 700 сомго барабар. Plus, Pro, Business, Enterprise жана Education сыяктуу жогорку төлөмдүү пландардын колдонуучулары жарнаманы көрүшпөйт.
OpenAI компаниясы тесттин максаты — колдонуучулардын пикирлерин чогултуу жана жарнаманы ChatGPT интерфейсине кантип ылайыктуу киргизүүгө болорун түшүнүү экенин билдирди. Компания көрсөткөн мисалдарда жарнамалар баннер түрүндө берилген.
Жарнама ChatGPTнин жоопторуна таасир этеби
Компания жарнама жооптордун мазмунуна таасир этпей турганын, ал эми колдонуучулардын сүйлөшүүлөрү жарнамачылар үчүн жеткиликсиз бойдон каларын баса белгиледи. Жарнамалар негизги контенттен так бөлүнүп, демөөрчүлүк катары белгиленет.
Euronews маалымдагандай, персоналдаштыруу сүйлөшүү темаларына, мурунку чаттарга жана жарнама менен болгон өз ара аракетке негизделет. Мисалы, рецепт издеп жаткан колдонуучу азык-түлүк жеткирүү кызматтарынын сунуштарын көрүшү мүмкүн.
Жарнамачыларга жеке маалыматтар берилбейт. Аларга агрегатталган көрсөткүчтөр — көрүүлөрдүн жана басуулардын саны гана жеткирилет.
Колдонуучулар төмөнкүлөрдү кыла алышат:
- жарнама менен болгон өз ара аракет тарыхын көрүү;
- аны тазалоо;
- жарнамаларды жашыруу;
- эмне үчүн белгилүү бир жарнама көрсөтүлгөнүн билүү;
- персоналдаштыруу жөндөөлөрүн башкаруу.
Рыноктун реакциясы жана атаандаштардын позициясы
Жарнаманы ишке киргизүү ар түрдүү реакция жаратты. Бул тема Супербоулдун түз эфиринде активдүү талкууланып, сын-пикирлерге кабылды.
OpenAIнин атаандашы — Claude ассистентин иштеп чыккан Anthropic компаниясы — жасалма интеллект жоопторуна орнотулган жарнама идеясына ирониялык маанайдагы роликтер сериясын чыгарды.
Видеолордун биринде апасы менен сүйлөшүү боюнча кеңеш сураган эркек адам ийгилик болбосо чоңдор үчүн таанышуу сайтына кайрылуу сунушун алат. Роликтер төмөнкү сөздөр менен аяктайт:
Жарнама AI дүйнөсүнө келет. Бирок Claude’га эмес.
ChatGPT түз айтылбаса да, кыйытма ачык болгон. OpenAIнин башкы директору Сэм Альтман бул кампанияга кескин реакция жасап, аны адилетсиз деп атап, Anthropic компаниясын авторитардык деп мүнөздөдү.
Биз буга чейин жазганыбызды эскертебиз, Steamде «Оюнчуга каршы оюнчу» фестивалы башталды, арзандатуулар 80 пайызга чейин
