Британиялык окумуштуулар жүргүзгөн жаңы изилдөө ооз көңдөсүнүн микрофлорасы когнитивдик функциялар менен байланышы болушу мүмкүн экенин көрсөттү. Жеңил когнитивдик бузулуусу бар 55 адамды изилдөөдө ооз көңдөсүндө Neisseria тукумундагы бактериялардын көп болушу эс тутумдун жакшырышы, көңүл буруу жана аткаруучу функциялар менен байланыштуу экени аныкталган. Ошондой эле 60 дени сак катышуучунун арасында да Neisseria деңгээли жогору болгондордун эс тутуму жакшыраак экени байкалган.
Бул тууралуу «InoZpress» шилтеме берүү менен билдирди Science Alert
Эксетер университетинин адистери микробиомду өзгөртүү менен когнитивдик ден соолукка таасир этүүгө мүмкүн экенин белгилешет. Белгилүү бактериялар тамак-аштагы нитраттарды азот кычкылынын өндүрүшүнө айлантып, бул кандын басымын жөнгө салууга, тиш эттерин коргоого жана нейрондук байланыштарды бекемдөөгө жардам берет. Бул механизм мээнин картаюу процессин жайлатууда маанилүү роль ойнойт.
Окумуштуулар Альцгеймер оорусуна генетикалык жактан жакын адамдардын микробиом курамы башкача болорун аныкташкан. Алардын ооз көңдөсүндө Neisseria эмес, Prevotella тукумундагы бактериялар басымдуулук кылганКошумча изилдөөлөр көрсөткөндөй, Prevotella бактериялары азот кычкылынын түзүлүшүнө керектүү нитраттарды колдонуп, аны жетишсиз кылат.
Бул мээнин коргоо механизмдерин алсыратуусу мүмкүн. Айрыкча, деменция коркунучу жогору болгон катышуучуларда P. intermedia бактериясы табылган, бул келечекте оорунун алгачкы биомаркери катары колдонулушу мүмкүн. Окумуштуулар тамактануу режимин өзгөртүү жана пробиотиктерди колдонуу менен микрофлоранын курамын жөнгө салып, когнитивдик бузулууларды алдын алууга болоорун айтышууда.
2021-жылкы изилдөөлөр Neisseria жана Haemophilus бактериялары басымдуулук кылган микробиом улгайган адамдардын когнитивдик жөндөмдүүлүгүнө оң таасирин тийгизерин көрсөттү. Neisseria деңгээлинин жогору болушу жаш курак, дене салмагынын төмөн индекси, жакшы тиш гигиенасы жана тамеки тартпоо менен да байланыштуу экени аныкталган. Буга байланыштуу окумуштуулар бул бактериялардын мээге тийгизген таасирин терең изилдөө керек экенин белгилешет.
Биз буга чейин жазганыбызды эскертебиз, ксенон Альцгеймер оорусун дарылоонун ачкычы болушу мүмкүн.
