Эркектердин жүрөк-кан тамыр ооруларына чалдыкпоо үчүн текшерүүлөрдү эртерээк баштоо зарыл. Journal of the American Heart Association журналында жарыяланган изилдөөгө ылайык, жүрөк оорусунун коркунучу орто эсеп менен 35 жаштан тарта өсө баштайт, деп билдирет Northwestern University, жазат InoZpress.
Илимпоздор 5112 адамдын ден соолугун 34 жыл бою байкап турушкан. Изилдөө башталганда катышуучулардын жашы 18ден 30га чейин болгон жана алардын баары ден соолугу чың адамдар болчу. Жылдар аралыгында инсульт жана жүрөк жетишсиздиги сыяктуу жүрөк-кан тамыр ооруларынын өнүгүү ылдамдыгы көзөмөлдөнгөн.
Эркектер менен аялдардагы айырма качан башталат
Жыйынтыктар көрсөткөндөй, жүрөк ооруларына байланыштуу жыныстык айырма болжол менен 35 жаш курагында пайда болот. Бул айырма негизинен жүрөк-кан тамырларында май топтолуп, кандын айланышын бөгөгөн ишемиялык жүрөк оорусуна байланыштуу.
Статистика боюнча эркектер жүрөк-кан тамыр ооруларынын 5 пайыздык көрсөткүчүнө аялдарга караганда орто эсеп менен жети жыл эртерээк – 50,5 жашында жетет. Ал эми ишемиялык жүрөк оорусу боюнча 2 пайыздык деңгээлге эркектер аялдардан орто эсеп менен он жыл мурда жетишет.
Изилдөө авторлору эмне дейт
Изилдөөнү АКШдагы Түндүк-Батыш университетинин эпидемиологу Алекса Фридман жетектеген. Ал жүрөк ооруларын эрте аныктоонун маанисин төмөнкүчө түшүндүргөн:
«Бул өтө эрте көрүнүшү мүмкүн, бирок жүрөк оорулары ондогон жылдар бою өнүгөт жана алардын алгачкы белгилерин жаш куракта эле аныктоого болот. Эрте скрининг жүрөк ооруларынын коркунучун азайтууга жардам берет».
Кандын басымы, холестерин, кант, дене салмагы, физикалык активдүүлүк жана тамеки тартуу сыяктуу факторлор эске алынгандан кийин да айырма толук жоголгон эмес. Бул, демек, себептердин бир бөлүгү организмдин биологиялык өзгөчөлүктөрүндө экенин көрсөтөт.
Айырманын мүмкүн болгон себептери
Илимпоздор гормондордун деңгээли менен холестериндин айырмасы бул көрүнүшкө таасир этиши мүмкүн деп эсептешет. Ошондой эле аялдар медициналык текшерүүлөрдөн эркектерге караганда көбүрөөк өтүшөрү статистикага таасир этет.
- Эркектер жүрөк ооруларынын жогорку коркунучуна аялдардан орто эсеп менен он жыл эртерээк жетет;
- Аялдарда окшош көрсөткүчтөр кийинки куракта байкалат;
- Инсульт жана жүрөк жетишсиздиги көпчүлүк учурда 60 жаштан кийин кездешет.
Изилдөөчүлөр орто жаштагы эркектер арасында профилактикалык медициналык текшерүүлөрдү күчөтүү жалпы өлүм деңгээлин төмөндөтүүгө жардам берерин белгилешет.
Биз буга чейин жазганыбызды эскертебиз, илимпоздор айрым химиялык заттардын склероз оорусу менен байланышын аныкташкан.
