1974-жылы Камерун вулканынан табылган Streptomyces arenae бактериялары чыгарган антибиотик молекуласы илимпоздордун кызыгуусун жараткан. Бул табигый кошулмада болгон кызыл пигменттердин микробго каршы касиеттери аныкталган. Бирок молекуланы кайра жаратуу өтө татаал болуп, ондогон жылдарды талап кылды.
Бул тууралуу «InoZpress» шилтеме берүү менен билдирди Science Alert
Токио илим институтунун изилдөөчүлөрү ретросинтетикалык анализ ыкмасын колдонуп, бул антибиотиктин негизги молекуласын синтездей алышты. Бул метод затты анын акыркы түзүлүшүнөн баштап изилдөөгө мүмкүндүк берет. Изилдөөнүн биринчи этабында β-нафтоциклинонго көңүл бурулуп, 70 пайыз натыйжалуу продукция алынган.
Кийинки этаптарда кычкылдандыруучу лактонизация деп аталган химиялык процесс колдонулду. Бул ыкма γ-нафтоциклинон деп аталган кошулманы 87 пайыздык натыйжа менен алуу мүмкүнчүлүгүн берди. Бул эки кошулма окшош болгону менен γ-нафтоциклинон кошумча өзгөчөлүктөргө ээ болуп, медициналык жактан өтө перспективдүү деп эсептелүүдө.
Лабораториялык шартта антибиотиктерди жаратуу табигый булактардан үлгү алуу муктаждыгын жокко чыгарат. Бул дары-дармектерди изилдөөгө, өндүрүүгө жана инфекцияларга каршы колдонууга жаңы мүмкүнчүлүктөрдү ачат. Окумуштуулар бул ачылыш жаңы дары-дармектердин жаралышына негиз болоруна ишенишет.
Биз буга чейин жазганыбызды эскертебиз, Майя календарынын иштөө сырын окумуштуулар ачышты.
