Кыргызстанда Ички иштер министрлигинин жетекчилеринин сүрөттөрүн колдонуп, жарандарды алдоо максатында тараган жаңы шылуундук схемасы аныкталды. Алдамчылар интернетте жарнамалык билдирүүлөрдү таратып, анда ИИМ жоголгон акчаларды кайтарып берет деп жалган маалыматтарды беришкен. Алардын айтымында, министрликтин кибербөлүмү шектүү брокерлердин айынан жапа чеккендердин акчаларын бир нече күндүн ичинде кайтарып берет. Бирок ИИМ бул маалыматтар жалган экенин расмий түрдө жарыялап, жарандарды этият болууга чакырууда.
Бул тууралуу «InoZpress» шилтеме берүү менен билдирди 24.kg
Укук коргоо органдары иликтөө иштерин баштап, аталган алдамчылык схемасына тиешеси болушу мүмкүн деген шектүүлөрдүн бирин аныктады. Ал 1985-жылы туулган, Чүй облусунун тургуну жана кош жарандыгы бар киши экени белгилүү болду. Башкы кылмыш иликтөө башкармалыгынын кызматкерлери анын жашаган жерине тинтүү жүргүзүп, ири суммадагы накталай акчаларды, ондогон банк карталарын, 90дон ашык SIM-карталарды жана SimBox деп аталган атайын жабдууну табышкан.
SimBox – бул эл аралык телефон чалууларды жергиликтүү чалуулар катары көрсөтүүгө мүмкүндүк берген аппарат. Мындай технология шылуундар тарабынан өздүгүн жашыруу жана укук коргоо органдарынын көзөмөлүнөн качуу үчүн колдонулат. Бул ыкма телефон аркылуу алдамчылык иштерин жасоо үчүн да кеңири пайдаланылат. Учурда тергөө амалдары жүргүзүлүп, шектүүнүн бул жабдууларга кантип ээ болгондугу, анын каржылык булагы жана башка шериктери бар-жогу такталууда.
Кармалган жаранга карата Кыргыз Республикасынын Кылмыш-жаза кодексинин 261-беренеси («Уюшкан топ түзүү же ага катышуу») боюнча кылмыш иши козголду. Ошондой эле, анын эл аралык кылмыштуу топтор менен байланышы жана анын ишмердүүлүгүнө чет өлкөлөрдөн каржылык колдоо көрсөтүлүшү мүмкүн экени иликтенүүдө. ИИМ жарандарды интернеттеги күмөндүү жарыяларга ишенбөөгө, жеке маалыматтарын бейтааныш адамдарга бербөөгө жана шектүү иштер тууралуу укук коргоо органдарына кабарлоого чакырат.
Биз буга чейин жазганыбызды эскертебиз, Кыргызстанда азык-түлүк бааларын көзөмөлдөө күчөтүлөт.
