Discover маалымдагандай, суткасына болгону болжол менен 80 мүнөткө уйкунун үзгүлтүксүз кыскарышы дене салмагынын көбөйүшүнө жана физикалык активдүүлүктүн төмөндөшүнө алып келиши мүмкүн. Мындай жыйынтыкка Annals of Internal Medicine журналында жарыяланган изилдөөнүн авторлору келишкен.
Изилдөөчүлөр кеп бир жолку уйкусуз түн тууралуу эмес, дайыма адаттагыдан кечирээк уктоого жатуу жөнүндө болуп жатканын белгилешет. Адистердин пикиринде, мындай режим убакыттын өтүшү менен зат алмашууга жана организмдин жалпы абалына таасир этиши мүмкүн, жазат InoZpress.
Изилдөө кандай жүргүзүлгөн
Изилдөөгө адатта суткасына жети-сегиз саат уктаган 95 чоң адам катышкан. Алардын ар бири алты жумадан турган эки байкоо этабынан өткөн.
Биринчи мезгилде катышуучулар кадимки уйку режимин сакташкан. Экинчи мезгилде болсо алардан уктоого жатуу убактысын болжол менен 90 мүнөткө кечеңдетүү суралган, натыйжада орточо уйкунун узактыгы күн сайын болжол менен 80 мүнөткө кыскарган.
Изилдөөнүн жүрүшүндө адистер төмөнкү көрсөткүчтөрдү көзөмөлдөшкөн:
- уйкунун узактыгы;
- физикалык активдүүлүктүн деңгээли;
- дене салмагы;
- белдин айланасы;
- дене курамы;
- табитке байланыштуу гормондор.
Окумуштуулар кандай өзгөрүүлөрдү аныкташты
Уйкусу кыскартылган мезгилден кийин катышуучулар орточо эсеп менен бир фунтка салмак кошушкан. Мындан тышкары, алар кыймылсыз абалда көбүрөөк убакыт өткөрө башташкан.
Изилдөөнүн жетекчиси Мари-Пьер Сен-Онж жетиштүү уйкунун маанисине токтолду.
«Биздин изилдөө жетиштүү уйку салмак кошуу жана семирүүгө байланыштуу жүрөк оорулары менен диабет сыяктуу оорулардын тобокелдигин азайтууга жардам бере аларын көрсөттү».
Изилдөөнүн биринчи автору Фарис Зурайкат кыска убакыттагы аз гана салмак кошуунун өзү көңүл бурууга арзый турганын белгиледи.
«Уйкунун аз гана кыскарышы учурунда байкалган бир фунт салмак кошуу чоң көрсөткүч болбосо да, анын болгону алты жуманын ичинде болгонун эстен чыгарбоо маанилүү».
Изилдөөнүн авторлору ошондой эле уйку азайган мезгилде катышуучулар күн сайын кыймылсыз абалда көбүрөөк убакыт өткөрүшкөнүн белгилешти. Бул өз кезегинде өнөкөт оорулардын өнүгүү тобокелдигин дагы жогорулатышы мүмкүн.
Эске салсак, мурда ден соолук үчүн сунушталган тамактануу режими тууралуу жазганбыз.
