22-апрелден 25-апрелге чейин Жер күндөгү активдүүлүктүн айынан күчтүү магниттик бороон-чапкындарга кабылууда. Күндүн короналдык тешигинен чыккан күн шамалынын агымы Жердин магнитосферасына тийип, геомагниттик термелүүлөрдү жаратты. NOAA жана TESIS сыяктуу эл аралык космостук агенттиктердин маалыматы боюнча, алдыдагы күндөрдө бороондордун деңгээли 4төн 6 баллга чейин сакталат. Айрыкча жогорку көрсөткүчтөр 22-апрелде байкалат, андан соң активдүүлүк акырын төмөндөйт.
Бул тууралуу «InoZpress» шилтеме берүү менен билдирди КТРК
Магниттик бороон-чапкындар спутниктүү жана навигациялык техниканын ишине гана эмес, адамдардын ден соолугуна да таасир этет. Космостук аба ырайына сезимтал адамдар баш оору, уйкусуздук, кан басымдын көтөрүлүшү жана өнөкөт оорулардын күчөшүнөн даттанышууда. Айрыкча улгайгандар жана метео көз каранды адамдар этият болушу керек. Синоптиктердин жана байкоочулардын божомолуна ылайык, эс алууга шарттар жекшемби күндөрү гана жаралат.
Геомагниттик таасир канчага чейин уланат
Meteoagent сайтынын жаңыланган божомолуна ылайык, 22-апрелде 6 баллдык бороон катталып, 23-апрелде күчү 5 баллга чейин төмөндөйт. Бул геоактивдүүлүктүн жай баскыч менен басаңдаганын билдирет жана окумуштуулардын эсеби боюнча, жума аягында гана толук басаңдайт. 24 жана 25-апрелде бороон 4 баллга чейин азайып, бул орточо деңгээл болуп эсептелет.
Ишемби жана жекшемби күндөрү планета салыштырмалуу тынчтыкка кайтып келет. Космостук кызматтар күн шамалынын агымынын басаңдашын божомолдошуп, Жердин магнитосферасы турукташат деп билдиришет. Бирок адистер эскертишет — бороон өткөндөн кийин да термелүүлөрдүн калдыктары, өзгөчө түндүк аймактарда, сезилиши мүмкүн.
Магниттик бороон эмнеден улам пайда болот
Учурдагы бороондордун себеби — Күндүн короналдык тешигинен чыккан күн шамалы. Бул агым заряддалган бөлүкчөлөрдөн турат жана Жердин магнит талаасына тийгенде, анын түзүлүшүн бузуп, магниттик термелүүлөрдү жаратат. Мындай көрүнүштөр көбүнчө Күндүн жогорку активдүүлүгү учурунда, анын 11 жылдык циклинин алкагында, байкалат.
Көпчүлүк учурда күчтүү агымдар күн тактарынын жана короналдык тешиктердин жанында байкалат. Апрелдин ортосунда Күндөн ошондой тешик байкалган жана ал Жер тарапты көздөй багытталган. Натыйжада бөлүкчөлөр Жерге жетип, орточо жана жогорку интенсивдүүлүктөгү бороондорду жаратты.
Магниттик бороондор күнүмдүк жашоого кандай таасир берет
Магниттик бороон-чапкындар учурунда GPS системаларында, радиобайланышта жана спутниктик навигацияда үзгүлтүктөр болушу мүмкүн. Кээ бир учурларда электр энергиясында жана телекоммуникация жабдууларынын ишинде да кыска мөөнөттүү көйгөйлөр байкалат. Айрыкча бул көрүнүштөр түндүк аймактарда жана магниттик талаасы алсыз жерлерде күчтүү болот.
Адамдар да бул өзгөрүүлөрдү сезишет. Баш ооруу, нервденүү, алсыроо — бороон учурунда кеңири таралган белгилер. Дарыгерлер мындай күндөрү оор иштерден качууга, көбүрөөк суу ичүүгө, экран алдында убакытты кыскартууга жана толук кандуу уйку менен камсыз болууга чакырышат. Ошондой эле алыс сапарлардан жана интенсивдүү акыл-ой жумуштарынан баш тартуу сунушталат.
Кийинки бороон качан күтүлөт
Адистер апрель аягына чейин геоактивдүүлүктүн кайталанышы ыктымал экенин эскертишет. Күндүн цикли жогорку фазада болуп жаткандыктан, жаңы короналдык тешиктердин же жарылуулардын пайда болушу күтүлүүдө. Азырынча жекшемби күндөрү кооптуулук азаймакчы, бирок майдын башында кайра күч алышы мүмкүн.
SpaceWeather жана Meteoagent сыяктуу мониторинг кызматтары абалды көзөмөлдөп, өз убагында маалымат берип жатышат. Өзгөчө ден соолугуна сезимтал адамдар бул маалыматтарды такай текшерип турууга чакырылат.
Биз буга чейин жазганыбызды эскертебиз, магниттик бороон убактылуу басаңдайт, бирок кайра күчүнө келет.
