NotebookCheck билдиргендей, энтузиасттар жаңы Classic 7 операциялык системасында тажатма жарнамасыз, телеметриясыз жана жасалма интеллектсиз эски жакшы Windows 7 доорун кайтарууну чечишти.
Classic 7 Windows 7 интерфейсин кайтарып, 2032-жылга чейин коопсуздук жаңыртууларын алуу мүмкүнчүлүгүн берет. Ал Xbox Game Bar’сыз, жарнамасыз жана Microsoft Edge’сиз кыскартылган жана жеңилдетилген Windows 10 IoT Enterprise LTSC 2021 базасында курулган. Classic 7 Windows 7деги «Пуск» менюсун жана тапшырмалар панелин, темаларды, гаджеттерди жана алгач Windows Vista’да пайда болгон Aero Glass эффектин колдойт, жазат InoZpress.
Бул операциялык система негизинен минималдуу талаптары бар интеграцияланган түзмөктөр үчүн арналган: 2 ГБ оперативдүү эс тутум жана 1 ГГц процессор жыштыгы жетиштүү болот. Бирок колдонуучулар лицензия алуунун жолун өз алдынча издеши керек, ошол эле учурда сынап көрүүнү каалагандар үчүн система активдештирүүсүз иштей берет.
Windows 7нин жумушчу чөйрөсүн салыштырмалуу заманбап операциялык системага киргизүү олуттуу өзгөртүүлөрдү талап кылат жана колдонуучулар Classic 7 иштеп чыгуучулары кооптуу өзгөртүүлөрдү киргизбегенине толук ишенүүгө аргасыз болушат. Азырынча бул операциялык система кандайдыр бир коркунуч туудурары тууралуу белгилер же билдирүүлөр жок.
Reddit колдонуучуларынын айрымдары система айрым оюндарда андан да жакшы өндүрүмдүүлүктү камсыз кыларын белгилешкен. Classic 7 операциялык системасын анын натыйжалуулугун текшерүү үчүн виртуалдык машинада иштетүүгө болот.
Буга чейин Microsoft эмне үчүн Windows 11 жаңыртуулары акыркы убакта көбүрөөк убакыт алып, айрым учурларда бир нече жолу кайра жүктөөнү талап кыларын түшүндүргөнү тууралуу жазылган. Ошондой эле Microsoft жаңыртуулар учурунда видеокарталар үчүн эски драйверлерди орнотуу көйгөйүн оңдоону убада кылган.
Эске салсак, буга чейин Google YouTube’дагы издөө системасын өзгөрткөнүн жана эми видеолор ачкыч сөздөрсүз табыларын жазганбыз.
