Бул тууралуу Казакстандын Өкмөтү билдиргендей, өлкөнүн чек арага жакын аймактарында күйүүчү-майлоочу материалдарды мыйзамсыз алып чыгууга бөгөт коюу чаралары күчөтүлдү. Бул үчүн мобилдик топтор сутка бою иштөө режимине өткөрүлүп, негизги багыттардагы транспорт каражаттарын текшерип жатышат.
Жаңы чаралар ички рынок үчүн күйүүчү майдын запастарын сактоого жана бензинди өлкөдөн мыйзамсыз ташып чыгууга бөгөт коюуга багытталган. Көзөмөл автоцистерналарга, бензин ташуучу унааларга жана кошумча бактарды колдонушу мүмкүн болгон жеңил автоунааларга да жайылтылды, жазат InoZpress.
Текшерүүлөр кандай жыйынтык берди
Казакстандын өкмөтүнүн маалыматына ылайык, акыркы эки сутка ичинде өткөрмө пункттарында кошумча бактарда жана канистрлерде ташылган үч тоннадан ашык күйүүчү-майлоочу материалды алып чыгууга жасалган 61 аракет токтотулду.
Мындан тышкары, мамлекеттик кирешелер органдары кызмат көрсөтүү көлөмүнүн адаттан тыш өсүшү катталган 62 май куюучу станциянын жана 22 чакан мунай иштетүүчү заводдун ишмердүүлүгүн талдап жатышат. Текшерүүлөр мүмкүн болгон мыйзам бузууларды аныктоого багытталган.
Кандай чектөөлөрдү сактап калуу пландалууда
Бийлик бензинди өлкөдөн алып чыгууга коюлган азыркы тыюуну дагы алты айга — 2026-жылдын ноябрынан 2027-жылдын майына чейин узартууну даярдап жатат. Бул чектөө Евразия экономикалык биримдигине кирген мамлекеттерди кошкондо бардык өлкөлөргө жайылтылышы мүмкүн.
Расмий түрдө күйүүчү майды автоунаалардын штаттык бактарында гана алып чыгууга уруксат берилет. Чек арага жакын аймактардагы көзөмөлдү күчөтүү үчүн тереңдетилген текшерүүлөрдү жүргүзгөн кызматкерлердин саны дагы көбөйтүлдү.
Эске салсак, буга чейин Чүйдө 30 млн сомдук тамеки жөнүндө жазганбыз.
