Bulak.kg маалымдагандай, Чүй облусундагы алтын казуучу ишкананын аймагында кытай тилиндеги жазууну алып салуу иштери башталды. Акыркы күндөрү бул жазуу социалдык тармактарда кеңири талкууга алынган.
Ишкананын өкүлдөрү жазуу 2015-жылы пайда болгонун жана ал кездеги эл аралык кызматкерлердин курамы менен байланыштуу болгонун түшүндүрүштү. Учурда кызматкерлердин басымдуу бөлүгүн Кыргызстандын жарандары түзөт, ал эми кытай тилиндеги жазууну алып салуу чечими коомдук талкуудан кийин кабыл алынган, жазат InoZpress.
Жазуу он жылдан ашык убакыт мурда пайда болгон
Ишкананын экологу Нурсланбек Абдысадыковдун айтымында, жазуу башында эки тилде жазылган. 2015-жылы ишкананын кызматкерлеринин болжол менен 60 пайызын Кытайдын жарандары түзгөндүктөн, текст кытай тилинде да берилген.
Анын айтымында, жазуу төмөнкүчө которулат: «Алтын менен күмүш гана эмес, кооз тоолор жана дарыялар да керек». Ал айлана-чөйрөнү коргоого арналган жана саясий мазмунду камтыбайт.
Андан соң ишкананын өкүлү коомчулукка түшүндүрмө берди.
«Урматтуу мекендештер, бул жазууну саясатташтырбоону өтүнөбүз. Бул Кытайдын кандайдыр бир чакырыгы эмес, айлана-чөйрөнү коргоого багытталган жалпы дүйнөлүк чакырык».
Жазууну эмне үчүн алып салууну чечишти
Компаниянын маалыматына ылайык, учурда ишкананын кызматкерлеринин болжол менен 95 пайызы Кыргызстандын жарандары. Жазуунун сүрөттөрү интернетте кеңири тарай баштагандан кийин жетекчилик кытай тилиндеги вариантын алып салуу чечимин кабыл алган.
Ошол эле учурда ишкана жазуу башынан эле экологиялык мааниге ээ болгонун жана жаратылышка аяр мамиле жасоого чакырык катары орнотулганын белгиледи.
Эске салсак, буга чейин Кыргызстанда мыйзам бузган чет элдик жарандарды депортациялоо үчүн жоопкерчилик тууралуу жазганбыз.
