Бул тууралуу «InoZpress» шилтеме берүү менен билдирди Bloomberg 

Сан-Францискодо өткөн иш-чарада AMD компаниясынын башчысы Лиза Су жакында маалымат борборлору үчүн жаңы MI325X чиптери жеткиликтүү болуп, алар Nvidia’нын H100 чиптеринен бир катар көрсөткүчтөр боюнча ашып түшөрүн жарыялады.

MI325X чиптеринин өзгөчөлүгү — жаңы эс тутум технологиясын колдонууда, бул жасалма интеллект менен иштөөдө анын өндүрүмдүүлүгүн бир топ жакшыртат. Бул өзгөчө инференция деп аталган процессте маанилүү — жасалма интеллект системаларындагы маалыматтарды иштетүүнүн негизги процесси. Nvidia көптөн бери бул тармакта лидер болгон, бирок AMD жаңы үлгүдөгү чиптерди жыл сайын чыгарып, анын артынан тездик менен келе жатат.

Компаниянын оптимисттик болжолдоруна карабастан, инвесторлордун реакциясы токтоо болду. Презентациядан кийин AMD акциялары 2%дан ашык төмөндөп, рынокто компаниянын Nvidia’ны кууп жетүү жөндөмүнө болгон күмөн саноолор сакталып жатканын көрсөттү. Бирок Лиза Су өз компаниясынын туура багытта экенине ишенип, жасалма интеллекттин чоң потенциалынан пайда алууга даяр экенин айтты.

Су башчылык кылган учурда AMD рыноктук баасы боюнча Intel’ди артта калтырды, бирок эки компания тең жасалма интеллект акселераторлоруна болгон суроо-талаптын кескин өсүшүнө даяр эмес болуп калышты. AMD ылдамыраак чара көрүп, Nvidia’га жакын атаандаш катары ордун бекемдеди. Компания быйыл жаңы чиптерден 4,5 миллиард доллар киреше табууну көздөп, жасалма интеллект чиптеринин базары 2028-жылга чейин 500 миллиард долларга жетерин божомолдоп жатат.

Мындан тышкары, AMD компаниясы сервердик процессорлордун жаңы линиясын “Турин” технологиясынын негизинде чыгарарын жарыялады. Бул Intel үстөмдүк кылган базарга жаңыча мамилени билдирет. 

192 ядролуу EPYC процессорлорунун бешинчи мууну Intel’дин акыркы продуктыларынан ашып түшөөрү күтүлүүдө. Учурда AMD сервердик процессорлор рыногунда 34% үлүшкө ээ болуп, бул Intel көп жылдар бою 99% базарды көзөмөлдөп келгенден кийинки чоң жетишкендик болуп саналат.

Биз буга чейин жазганыбызды эскертебиз, сүрөттөрдүн мазмуну боюнча жасалма интеллект жардам берет.