Узак убакыт музыка менен машыгуу когнитивдик жөндөмдөрдү гана эмес, ооруну кабылдоого да таасир этери аныкталды. Музыканттар менен музыкадан алыс адамдардын жасалма түрдө пайда болгон ооруну кандайча кабылдаганын салыштырган изилдөөдө ушундай жыйынтык чыкты. Бул тууралуу The Conversation жазат InoZpress.
Эксперимент көрсөткөндөй, музыканттардын мээси мотордук активдүүлүктү так жана туруктуу сактап, бир нече күндүк оорудан кийин да өзгөрүүсүз калган. Музыка менен машыккан катышуучулар ооруну азыраак сезишкен, алардын мээси болсо оорудан коргоочу таасирди көрсөттү. Бул көрүнүш узак мөөнөттүү музыкалык машыгуулар ооруну жеңилдетүүчү буфер түзөрүн көрсөтөт.
Изилдөө кандай өткөн
Изилдөөчүлөр коопсуз түрдө булчуңдагы ооруну пайда кылуу үчүн «нерв өсүү фактору» деп аталган белокту колдонушкан. Кол булчуңдарына жасалган инъекция кыймылдаганда убактылуу ооруну жараткан, бирок зыян келтирген эмес. Бул метод көп машыгуунун натыйжасында музыканттарда пайда болгон кадимки булчуң ооруларына жакын абалды чагылдырды.
Андан соң адистер транскраниалдык магниттик стимуляция ыкмасын колдонуп, кол кыймылын көзөмөлдөгөн мээ активдүүлүгүнүн картасын түзүшкөн. Салыштырмалар инъекцияга чейин, эки күндөн кийин жана сегиз күндөн кийин жүргүзүлгөн. Музыка менен алектенбегендердин картасы эки күндүн ичинде кичирейген, ал эми музыканттарда өзгөрүүсүз калган.
Эмне үчүн музыканттардын мээси туруктуураак
Окумуштуулар белгилегендей, музыкант канчалык көп машыкса, анын мээ картасы ошончолук туруктуу болгон. Бул көп жылдык машыгуулар кыймылды жана ооруну көзөмөлдөгөн нейрон байланыштарын чыңдай турганын далилдейт. Натыйжада мээ кайталап келген оорулардын терс таасирине азыраак дуушар болот.
Изилдөөгө болгону 40 адам катышканына карабастан, айырмачылыктар ачык байкалган. Музыканттар ооруну азыраак сезишкен жана алардын мотордук зоналары башкача иштеген. Бул окумуштууларга тажрыйба жана машыгуу ооруну кабылдоого кантип таасир этерин изилдөөгө жаңы мүмкүнчүлүк ачат.
Мүмкүн болгон келечек
Музыка өнөкөт ооруну дарылоонун жолу болуп эсептелбесе да, музыканттардын тажрыйбасы мээнин реакцияларын машыгуу аркылуу өзгөртүүгө болорун көрсөтөт. Келечекте бул маалымат мээге «кайра жөнгө салуу» жүргүзүп, дайыма оору сезген бейтаптарга жардам берүүчү жаңы терапияларды иштеп чыгууга негиз боло алат.
Изилдөөчүлөр командасы азыр музыкалык билим берүү өнөкөт оорулар учурунда көңүлдү жана ой жүгүртүүнү өзгөрүүлөрдөн да коргой алабы деген жаңы эксперименттерди пландап жатат. Бул ыкма медикаментсиз жардам берүүнүн альтернативалуу жолу болушу мүмкүн.
Биз буга чейин жазганыбызды эскертебиз, вирус болуп кеткен изилдөө жаңылыш экени аныкталды.
