Генеративдик «AI slop» видеолору — сүйлөгөн маймылдар же фантастикалык жаныбарлар тартылган роликтер — суктанууну да, түшүнбөстүктү да жаратат. The Conversation белгилегендей, мындай контент толук кандуу сюжетке ээ болбосо да, миллиондогон көрүүлөрдү топтоп, авторлорго киреше алып келет, жазат InoZpress.
Изилдөөчүлөрдүн айтымында, мындай роликтердин популярдуулугун түшүнүү үчүн кино тарыхына кайрылуу зарыл. Кинематографтын алгачкы мезгилинде, 1895–1908-жылдары, көрүүчүлөрдү окуя эмес, көзгө көрүнгөн керемет тартчу. Люмьер бир туугандарынын алгачкы тасмалары же Жорж Мельестин трюктуу кинолору ырааттуу сюжеттен көрө технология жана эффекттер менен суктандырган.
Сюжеттин ордуна спектакль
Алгачкы тасмалар, мисалы, «Поезддин Ла-Сьотага келиши» (1895), жаңычылдыгы менен көрүүчүлөрдү таң калтырган. Эффекттер, трюктар жана экрандагы кыймылдын өзү окуядан маанилүүрөөк болгон. Бул ыкманы кийинчерээк Том Ганнинг «аттракциондор киносу» деп атаган.
Азыркы AI-видеолор да дал ушундай визуалдык өзгөчөлүк менен «вау» эффект жаратат. Алардан форма өзгөрткөн мышыктарды же жок болуп кайра пайда болгон объекттерди көрүүгө болот. Мындай кемчиликтер алгачкы кинолордун техникалык чектөөлөрүн эске салат жана «AI slop» жаңы медианын эксперименттеринин бир бөлүгү экенин көрсөтөт.
Суктануу жана көңүл калуу
Бир кылым мурдагыдай эле көрүүчүлөр жаңы технологияларга суктануу менен сын көз карашты бирге билдиришет. XX кылымдын башында кинону арзан оюн-зоок катары эсептешкен, ал тургай айрымдар анын балдарга тийгизген таасиринен кооптонушкан. Бирок убакыт өтүп, кино искусствонун деңгээлине көтөрүлдү.
Бүгүн «AI slop» да шылдыңдалат жана «контентти булгоо» катары кабыл алынат. Бирок тамашалардан сырткары, автордук эмгекке тийгизген таасири, маалыматтарды үйрөтүүдө этика маселелери жана технологиялардын экологиялык чыгымдары сыяктуу суроолор кала берүүдө.
Массовдук көңүл ачуудан искусствого чейин
Кино тарыхы көрсөткөндөй, спектаклден искусствого чейинки жол ондогон жылдарды талап кылышы мүмкүн. Бүгүнкү күндө компаниялар AI аркылуу толук метраждуу долбоорлорду жарата баштады, мисалы, «Critterz» анимациялык фильми. Бул сыноолор келечектеги жаңы кинематографиянын негизи болушу мүмкүн.
Качандыр бир кезде трюктар жана поезддер тартылган кыска тасмаларды шек менен кабыл алышса, бүгүнкү AI-роликтер да жаңы искусствонун алгачкы кадамдары катары тарыхта калышы ыктымал. Алардын кемчиликтери форматты жана мүмкүнчүлүктөрдү издөөнүн жүрүп жатканын гана баса белгилейт.
Биз буга чейин жазганыбызды эскертебиз, кантип ийгиликтүү фитнес-бизнес курууга болот.
